اسلام آباد (ڈیسک) پاکستان مسلم لیگ (ن) کی چیف آرگنائزر مریم نواز شریف نے چیف جسٹس آف پاکستان سے مخاطب ہوتے ہوئے کہا ہے کہ اب سیاسی رد عمل کے لیے تیار رہیں۔
اپنی ٹوئٹ میں مریم نواز نے کہا ہے کہ چیف جسٹس ہونے کا مطلب ریاست کو اس شخص کی غلامی میں دینا نہیں جس نے اپنے پالتو غنڈوں کے ذریعے قومی وقار اور ملکی دفاع کی ہر علامت کو جلا کر راکھ کردیا۔
مریم نواز نے کہا کہ کیا مجرم کو عدالت کو اپنی پناہ گاہ بنانے دینے کا کوئی نیا قانون ہے؟
انہوں نے مزید کہا کہ ایسے شخص کو کسی بھی مقدمے میں گرفتاری سے روکنا ، اسے شاہی مہمان بنا کر رکھنا، اس کے نخرے اٹھانا ہر پاکستانی کے علاوہ ان شہیدوں اور غازیوں کی توہین ہے جن کی ہر نشانی پر حملہ کیا گیا۔
مریم نواز نے کہا کہ چیف جسٹس صاحب! آپ اب عدلیہ ہی نہیں، آئین و قانون نظام انصاف اور ملکی سلامتی کے لیے خطرہ بن چکے ہیں، ملکی تقدیر سے کھیلنے والے ایک دہشتگرد کے سہولت کار بننے کے بعد آپ اپنا وقار کھو چکے ہیں۔
انہوں نے مزید کہا کہ آپ اپنی کرسی کو عمران کی سیاست کے لیے استعمال کر رہے ہیں تو اب سیاسی رد عمل کے لیے تیار رہیں۔