اسلام آباد (ڈیسک) چیف جسٹس آف پاکستان سے دو سکیورٹی اداروں کے سربراہان نے چیمبر میں اہم ملاقات کی ۔
ذرائع کے مطابق سپریم کورٹ کے چیف جسٹس عمر عطا بندیال سے چیمبر میں 2 اعلیٰ ترین سکیورٹی اداروں کے سربراہان کی اہم ملاقات ہوئی، ملاقات میں پنجاب انتخابات کیس سننے والے جج صاحبان بھی شامل تھے جبکہ ایک وفاقی سیکریٹری بھی موجود تھے۔
ملاقات میں موجودہ سکیورٹی صورتحال ،دہشت گردی کے خلاف جنگ اور انتخابات میں فورسز کی دستیابی سے متعلق امور پر بریفنگ دی گئی۔
ذرائع کے مطابق 3سے 4 گھنٹے تک جاری رہنے والی ملاقات اچانک نہیں بلکہ پہلے سے طے شدہ تھی۔
سپریم کورٹ میں ڈیوٹی پر مامور افسران نے مذکورہ اعلیٰ عہدیداران کا استقبال کیا اور انہیں چیف جسٹس کے چیمبر تک پہنچایا ۔
افسران کے ساتھ کے ان کے اسٹاف عہدیداران بھی تھے تاہم انہیں چیف جسٹس کے چیمبر تک رسائی نہیں دی گئی۔
دوسری جانب وزارت دفاع کے لیگل ڈپارٹمنٹ کے افسران نے اٹارنی جنرل آفس میں بھی اہم ملاقات کی، جس کے بعد یہ سپریم کورٹ میں ایک ہی روز میں دوسری اہم ملاقات ہے۔
یاد رہے کہ سپریم کورٹ نے 4اپریل کو پنجاب میں عام انتخابات کے حوالے سے حکم دیتے ہوئے وفاقی حکومت کو 21 ارب روپے اور سکیورٹی فورسز کی فراہمی کا حکم دے رکھا ہے۔