پشاور (ڈیسک) گورنر خیبر پختونخوا حاجی غلام علی نے اپیل کی ہے کہ پی ٹی آئی الزامات کی سیاست ختم کرکے آل پارٹیز کانفرنس میں شرکت کرکے اپنا مؤقف بیان کرے۔
پشاور میں میڈیا سے گفتگو کرتے ہوئے گورنر خیبرپختونخوا نے کہا کہ جب پی ٹی آئی کے استعفے قبول ہوئے تو وہ ہائیکورٹ چلے گئے کہ ہمیں بحال کرو، آج بھی ان سے اپیل ہے کہ ملک کے مسائل کو دیکھ کر فیصلے کریں، آل پارٹیز کانفرنس میں شرکت کرکے اپنا مؤقف بیان کریں، آپ کو الزامات کی سیاست ختم کرنا ہوگی۔ انہوں نے مزید کہا کہ الیکشن کمیشن کی ذمہ داری ہے کہ وہ غیرجانبدارنہ الیکشن کرائے اور حالات دیکھ کر الیکشن کا فیصلہ کرے، انھوں نے کہا کہ الیکشن کمیشن کو رائے دیتا ہوں حکم نہیں۔گورنر نے دعویٰ کیا کہ پی ٹی آئی رہنما پرویز خٹک آنے والا الیکشن کسی اور پارٹی کے ساتھ مل کر لڑیں گے۔انھوں نے کہا کہ پرویز خٹک کو کہتا ہوں آپ کے گورنر 4 برس میں 400 آدمیوں سے بھی نہیں ملے مگر آج لوگ کہتے ہیں کہ عوامی گورنر آیا ہے، میرےپاس پی ٹی آئی کے اراکین صوبائی و قومی اسمبلی بھی آتے ہیں۔