لاہور (ڈیسک) مسلم لیگ (ن) کے رہنما عطاء اللہ تارڑ کا کہنا ہے کہ پرویز الٰہی پنجاب اسمبلی ایسے چلاتے ہیں جیسے گجرات کی ضلع کونسل ہو۔ لاہور میں میڈیا سے گفتگو کرتے ہوئے انھوں نے کہا کہ 18 ایم پی ایز کی معطلی کے خلاف پٹیشن کی جلد سماعت کی درخواست دائر کر رہے ہیں جس میں اسپیکر کے الیکشن کو بھی چیلنج کیا گیا ہے۔ انہوں نے بتایا کہ وفد چیف جسٹس امیر بھٹی سے بھی ملے گا۔ انہوں نے مطالبہ کیا کہ ہم دو پٹیشنز کی جلد سماعت چاہتے ہیں۔ان کا کہنا تھا کہ عمران خان لاڈلہ بننے کی کوشش کر رہے ہیں، جو سپورٹ انہیں مل رہی ہے وہ کسی اور کو نہیں ملی۔ انہوں نے مزید کہا کہ یہ جس کے خلاف ٹرینڈ چلا رہے ہیں اسے غیر معینہ مدت کی توسیع بھی دینے کو تیار تھے۔ یہ نہیں ہوسکتا کہ تین اسمبلیوں کے الیکشن پہلے ہوں یا دو کے بعد میں ہوجائیں۔