فیصل آباد(ڈیسک)سخت حکومتی ہدایات کی روشنی میں پتنگ بازی پر پابندی کی خلاف ورزی کرنے والے بچوں سمیت ان کے والدین کے خلاف بھی بھرپور کاروائی کافیصلہ کیا گیا ہے اورکہا گیا ہے کہ تما م والدین اپنے بچوں کو پتنگ بازی سے بازرکھیں بصورت دیگر اگر کسی جگہ پر کوئی بچہ یابڑا پتنگ بازی کرتاہوا پکڑا گیا تو اس کے ساتھ ساتھ اس کے والدین کے خلاف بھی سخت کاروائی عمل میں لائی جائے گی اور بعد ازاں کوئی عذر قابل قبول نہ ہوگا۔

سٹی پولیس فیصل آباد کے ترجما ن نے بتایاکہ حکومت کی جانب سے پتنگ سازی اور پتنگ بازی پر سختی سے پابندی عائد ہے جبکہ غیر قانونی طور پر پتنگیں اور ڈوریں تیارکرنے والے افراد کے خلاف کریک ڈان بھی کیاجارہاہے۔ انہوں نے کہاکہ اسی ضمن میں فیصل آباد کے مختلف علاقوں میں اچانک چھاپے مار کر بڑی تعداد میں پتنگیں، ڈوریں، کیمیکل ڈور کے گولے اور ڈور بنانے والی مشینیں بھی برآمد کرلی گئی ہیں۔ انہوں نے بتایاکہ ملزمان کے خلاف 4کائٹ فلائنگ ایکٹ کے تحت مقدمات درج کرلئے گئے ہیں جبکہ باقی ملزمان کی گرفتاری کیلئے سپیشل ٹیم بھی تشکیل دیدی گئی ہے۔ انہوں نے کہاکہ آئندہ بھی پتنگ سازی اور پتنگ بازی کرنے والوں کے ساتھ کوئی رعائت نہیں برتی جائیگی۔