کراچی(ڈیسک)پاکستان پیپلز پارٹی نے بھی انتخابی نتائج مسترد کردیے ہیں پارٹی چیئرمین بلاول بھٹو زرداری کا کہنا ہے کہ الیکشن کمشنر مستعفی ہوجائیں،میں پارلیمنٹ میں پہنچ کر یہ مقدمہ لڑوں گا۔
کراچی میں پارٹی رہنماوں کے ہمراہ پریس کانفرنس کرتے ہوئے بلاول بھٹو زرداری کا کہنا تھا کہ یہ فری اینڈ فیئر الیکشن نہیں تھے، ہم جمہوری لوگ ہیں اور اس الیکشن کو مسترد کرتے ہیں۔
ان کا کہنا تھا کہ شفاف انتخابات کرانا الیکشن کمیشن کی ذمہ داری ہے اس لیے الیکشن کو مشکوک کرنے کی ضرورت نہیں تھی۔الیکشن کمیشن ناکام ہو گیا اس لیے چیف الیکشن کمشنر فوری طور پر مستعفی ہو جائیں۔
چیئرمین پیپلز پارٹی نے کہا کہ دیگر جماعتوں کو بھی انتخابی نتائج پر سنجیدہ تحفظات ہیں، ہم ان سے بات کریں گے۔
بلاول بھٹو نے سیاسی جماعتوں کو تجویز دی کہ اس وقت پارلیمانی فورم کو نہ چھوڑیں۔
ان کا کہنا تھا کہ پارلیمان میں جا کر بھی اس معاملے کو آگے لے کر جاوں گا، پارلیمنٹ میں ڈٹ کر اپوزیشن کریں گے اور میں بتاؤں گا کہ اپوزیشن کیا ہوتی ہے۔
چیئرمین پیپلز پارٹی کا کہنا تھا کہ الیکشن سے متعلق فیکٹ فائنڈنگ کا عمل شروع کریں گے، دوسری سیاسی جماعتوں کے اعتراضات کو بھی دیکھنا چاہیے۔
ایک سوال کے جواب میں بلاول بھٹو زرداری کا کہنا تھا کہ ہمارے وزیر اعلیٰ سندھ مراد علی شاہ ہی ہوں گے۔
خیال رہے کہ ایم ایم اے کے سربراہ مولانا فضل الرحمان اور مسلم لیگ ن کے صدر شہباز شریف کی زیر صدارت ہونے والی کل جماعتی کانفرنس میں الیکشن نتائج کو مسترد کرتے ہوئے ملک میں ازسرنو شفاف انتخابات کرانے کا مطالبہ کیا گیا تھا
