اسلام آباد (ڈیسک) پاکستان میں ایچ آئی وی کا مرض وبائی صورتحال اختیار کرنے لگا ہے، ماہرین صحت نے خبردار کیا ہے کہ اگر مسئلے پر فوری قابو نہ پایا گیا تو پاکستان میں افریقا جیسی صورتحال کا خدشہ ہے۔
سابق وفاقی مشیر صحت ڈاکٹر فیصل سلطان کے مطابق کچھ عرصہ میں ان کے ہر کلینک میں ایچ آئی وی کے تین سے چار نئے نوجوان مریضوں کی تشخیص ہوئی ہے، جس سے ثابت ہوتا ہےکہ اب یہ خاموش وبا نہیں رہی۔
سابق وفاقی مشیر برائے صحت ڈاکٹر ظفر مرزا کا کہنا ہےکہ پاکستان ایچ آئی وی کی “وبا کے دہانے” پر ہے۔
وفاقی وزارت صحت کے حکام کے مطابق ملک بھر میں ہر ماہ ایچ آئی وی کے تقریباً ایک ہزار نئے کیس رپورٹ ہو رہے ہیں لیکن اندازہ ہے کہ ایچ آئی وی میں مبتلا افراد کی تعداد اس سے کہیں زیادہ ہو سکتی ہے، صرف صوبہ سندھ میں ایچ آئی وی میں مبتلا بچوں کی تعداد تقریباً اٹھائیس سو سے زائد ہوچکی ہے۔