راولپنڈی (ڈیسک) پاکستان اور انگلینڈ کی کرکٹ ٹیموں کے درمیان ہونے والی ٹیسٹ سیریز کے پہلے میچ کے تیسرے دن پاکستان 499رنز کے عدد کو چھو سکا اور اس کے سات کھلاڑی آئوٹ ہوئے۔ اس اننگز میں نقصان سے بچنے کے لیے پاکستان کو مزید 158رنز درکار ہیں۔
آج پاکستان نے کھیل کا آغاز بغیر نقصان181 رنز سے کیا، اوپنرز عبداللہ شفیق اور امام الحق نے بہترین کھیل کا مظاہرہ کیا اور دونوں نے سنچریاں اسکور کیں۔ عبداللہ شفیق نے 177گیندیں کھیلتے ہوئے تین چھکوں اور 10 چوکوں کی مدد سے 114رنز بنائے۔
اس کے بعد امام الحق نے بھی 180گیندیں کھیل کر ایک چھکے اور 14چوکوں کی مدد سے اپنی سنچری مکمل کی، انھوں نے 121رنز بنائے۔ پاکستان کی پہلی وکٹ 225کے مجموعی اسکور پر گری، پاکستان کی جانب سے آئوٹ ہونے والے تیسرے کھلاڑی اظہر علی تھے جو صرف 27رنز بنا سکے۔
انگلینڈ نے چوتھی وکٹ سعود شکیل کی حاصل کی، سعود نے 37رنز بنا کر پاکستان کا اسکور 413تک پہنچا دیا۔
بابر اعظم نے اچھا کھیل پیش کیا اور سنچری اسکور کی۔ انھوں نے محمد رضوان کے ساتھ 60رنز کی پارٹنر شپ بنائی، البتہ 473رنز کی مجموعی اسکور پر بابر اعظم 136ذمے دار رنز بنا کر آئوٹ ہو گئے۔
ٹیم کا اسکور 475تک پہنچا تو محمد رضوان بھی بابر اعظم کے پیچھے پویلین پہنچ گئے۔ وہ صرف 29رنز ہی بنا سکے۔ آخری کھلاڑی نسیم شاہ تھے جنھوں نے 15رنز اسکور کیے۔