اسلام آباد (ڈیسک) وزیر خزانہ اسحاق ڈار کا کہنا ہے کہ پاکستان کی ترقی اورخوشحالی اللہ کے ذمے ہے، اللہ ہمت دے گا۔
وزیر خزانہ اسحاق ڈار نے اسلام آباد میں تقریب سے خطاب میں کہا کہ پوری ٹیم دن رات کام کر رہی ہے، میرا ایمان ہے پاکستان ترقی کرے گا۔ اسحاق ڈار نے کہا کہ پاکستان دنیا میں باقی رہنے کے لیے قائم ہوا ہے، پاکستان دنیا کا واحد ملک ہے جو کلمے کی بنیاد پر بنا۔ انہوں نے کہا کہ اگر اللہ نے پاکستان کو بنایا ہے تو اس کی حفاظت، ترقی، خوشحالی اس کے ذمے ہے۔ اسحاق ڈار نے کہا کہ شہبازشریف کی قیادت میں پوری کوشش کریں گے کہ پاکستان کے حالات میں بہتری لاسکیں، جو ڈرامہ پانچ سال پہلے شروع ہوا، پاکستان آج اس کے نتائج بھگت رہاہے۔ پچھلے سال پاکستان کی معیشت دنیا کی 45ویں معیشت تھی۔ اسحاق ڈار نے کہا کہ 24ویں معیشت سے 20ویں معیشت پرداخل ہونے کی پیشگوئی کی گئی، کیا وجہ ہےپیشگوئی کے باجود ہم 47ویں معیشت بن گئے ہیں۔ سوچیں پاکستان کہاں جا رہا تھا اور آج ہم 47 ویں معیشت بن چکے ہیں۔وزیر خزانہ اسحاق ڈار نے کہا کہ وزیر اعظم شہباز شریف کو بےپناہ چیلنجز ملے ہیں۔ انہوں نے کہا کہ وزیر اعظم کی قیادت میں کوشش کریں گے کہ الیکشن سے پہلے بہتری لائیں۔