کراچی (ڈیسک) وزیراعلیٰ سندھ سید مراد علی شاہ سے ورلڈ بینک کے ریجنل ڈائریکٹر جان رووم کی سربراہی میں وفد نے ملاقات کی، ا جلاس میں کنٹری ڈائریکٹر اور دیگر شعبوں کے ماہرین نے وڈیو لنک پر شرکت کی، اجلاس میں سیلاب متاثرہ کسانوں کو بیج کی فراہمی کا جائزہ لیا گیا، وزیراعلیٰ سندھ نے بتایا کہ ورلڈ بینک نے کسانوں کو بیج دینے کیلیے 100 ملین ڈالر مختص کیے ہیں، ساڑھے 12 ایکڑ زمین رکھنے والے چھوٹے کاشتکاروں کو زیادہ رقم دینے کا فیصلہ کیا گیا ہے، ورلڈ بینک نے 25 ایکڑ تک کے کاشتکاروں کو 5000 فی ایکڑ بیج دینے کا وعدہ کیا ہے، محکمہ زراعت اور روینیو چھوٹے کاشتکاروں سمیت کسانوں کی کل زمین کی ڈیٹا تشکیل دے رہی ہے، پورے صوبے میں سروے شروع کردیا گیا ہے، گھروں کی تعمیر کےلیے تپہ سطح پر سروے شروع کردیا گیا ہے، سروے مکمل ہوتے ہی عالمی بینک سے ڈیٹا شیئر کیا جائے گا۔ وزیراعلیٰ نے اجلاس میں بتایا کہ ورلڈ بینک نے گھروں کی تعمیر کیلیے110 ارب روپے دینے کا وعدہ کیا ہے، گھروں کی تعمیر کے سروے کا کام حتمی مراحل میں ہے۔ ورلڈ بینک کی معائنہ ٹیم نے حکومت سندھ کے سروے پر اطمینان کا اظہار کیا۔ اجلاس میں بتایا گیا کہ آئندہ ہفتے ورلڈ بینک کی ٹیم سمیت جائزہ ٹیم آئے گی جو تمام منصوبوں کو حتمی شکل دے گی۔ وزیراعلیٰ نے ورلڈ بینک کے وفد کو بتایا کہ کراچی میں متاثرہ سڑکوں کی مرمت اور تعمیر نو کا کام تیزی سے جاری ہے۔