اسلام آباد (ڈیسک) وزیراعظم محمد شہباز شریف نے بلوچستان کے علاقے ہرنائی میں ہیلی کاپٹر حادثے میں افسران اور جوانوں کی شہادت پر گہرے دکھ اور افسوس کا اظہار کیا ہے۔

وزیراعظم آفس کے میڈیا ونگ سے جاری بیان کے مطابق وزیراعظم نے ہرنائی میں ہیلی کاپٹر حادثے میں 6 افسران و جوانوں کی شہادت پر افسوس کا اظہار کیا ۔ وزیراعظم نے شہدا میجر خرم شہزاد، میجر محمد منیب افضل، صوبیدار عبدالواحد، سپاہی محمد عمران، نائیک جلیل اورسپاہی شعیب کے اہل خانہ سے تعزیت کی۔ وزیراعظم نے کہا کہ مادر وطن کے تحفظ، سلامتی اور دفاع کے لیے افواج پاکستان نے بےمثال قربانیاں دی ہیں، قوم کو اپنے شہدا پر فخر ہے، شہدا کی قربانیاں ناقابل فراموش ہیں۔ وزیراعظم نے دعا کی کہ اللہ تعالیٰ شہدا کے درجات بلندکرے اور اہل خانہ کو صبر جمیل عطا فرمائے۔