لاہور (ڈیسک) ترجمان مسلم لیگ (ن) مریم اورنگزیب کا کہنا ہےکہ حکومت عوام کی مدد کے لئے ہنگامی اقدامات کرے،آکسیجن سلنڈرز اور وینٹی لیٹرز کی کمی اور عدم دستیابی کا نوٹس لیں ۔

پاکستان مسلم لیگ (ن)کی ترجمان مریم اورنگزیب نے کورونا مریضوں کے علاج معالجے کی ادویات اور دیگر طبی سامان کی نایابی اور مہنگے داموں دستیابی پر شدید احتجاج کرتے ہوئے کہاکہ عمران صاحب بازار میں آکسی میٹرز ہزاروں روپے میں فروخت کرکے عوام کو لوٹا جارہا ہے ،آپ وزیر صحت اور وزیراعظم ہیں، خدارا جاگ جائیں، عوام کورونا سے مررہے ہیں ،گھروں میں زیرعلاج کورونا مریضوں کی دوائی کی قیمت آسمان کو چھو رہی ہے۔چند سو روپے میں دستیاب ہونے والا آکسی میٹر اس وقت ہزاروں روپے میں بلیک ہورہا ہے ۔کورونا کی دوائیاں بازار سے غائب ہیں یا پھر سونے کے بہاو فروخت ہورہی ہیں ۔بھاپ لینے والے کرسٹل تک بازار میں انتہائی مہنگے داموں فروخت ہورہے ہیں، آپ کہاں ہیں؟،کھانے پینے کی اشیائ، آٹا، چینی، انڈے، دالیں اور دیگر ضروریات زندگی عوام کی پہنچ سے باہر ہوچکی ہیں ۔ عوام کو حالات کے رحم وکرم پر نہ چھوڑیں، ہسپتالوں کا دورہ کریں ، دیکھیں لوگ کس طرح خوار ہورہے ہیں۔آکسیجن سلنڈرز اور وینٹی لیٹرز کی کمی اور عدم دستیابی کا نوٹس لیں ۔کورونا سے عوام کی سانس بند ہورہی ہے، حکومت عوام کی مدد کے لئے ہنگامی اقدامات کرے۔