نیو یارک (ڈیسک) وزیراعظم محمد شہبازشریف آج اقوام متحدہ کے سیکریٹری جنرل انتونیو گوتیرس اور مائیکرو سافٹ کے بانی بل گیٹس سمیت متعدد عالمی رہنماؤں سے ملاقاتیں کریں گے.

وزیر اعظم پاکستان میں حالیہ سیلاب سے ہونے والی تباہی کو اجاگر کرنے کے لیے اقوام متحدہ سیکریٹریٹ میں لگائی گئی تصویری نمائش کا بھی دورہ کریں گے۔ وزیراعظم آفس کے میڈیا ونگ سے جمعرات کو جاری بیان کے مطابق اقوام متحدہ کی جنرل اسمبلی کے 77ویں اجلاس کے اعلیٰ سطح کے مباحثے کے تیسرے روز وزیر اعظم محمد شہباز شریف نیویارک میں سرگرمیوں سے بھرپور دن گزاریں گے۔ اقوام متحدہ کے ہیڈ کوارٹرز روانگی سے قبل وزیر اعظم محمد شہباز شریف سے بل گیٹس ملاقات کریں گے۔ اقوام متحدہ ہیڈ کے کوارٹرز پہنچنے پر وزیر اعظم، اقوام متحدہ کے سیکریٹری جنرل انتونیو گوتیرس سے ملاقات میں دو طرفہ امور پر بات چیت کریں گے۔ بعد ازاں وزیر اعظم اقوام متحدہ سیکریٹریٹ کی لابی میں پاکستان مشن کی جانب سے پاکستان میں حالیہ سیلاب کی تباہی کو اجاگر کرنے کے لیے لگائی گئی تصویری نمائش کا دورہ کریں گے۔ بعد ازاں وزیر اعظم، اپنے جاپانی ہم منصب فومیو کیشیڈا، بیلجیم کے وزیر اعظم الیگزینڈر ڈی کرو اور ملائشیا کے وزیر اعظم اسماعیل صابری یعقوب سے الگ الگ ملاقاتوں میں باہمی دلچسپی کے امور پر گفتگو کریں گے۔