فیصل آباد (ڈیسک) ملک بھر میں خون کے عطیات کا عالمی دن (ورلڈ بلڈ ڈونرز ڈے) 14 جون بروز منگل کو بھر پور طریقے سے منایا جائیگا۔

مذکورہ دن کی مناسبت سے خصوصی تقریبات،کانفرنسز، ورکشاپس اور دیگر پروگرامز کا انعقاد کیا جائیگا جبکہ عوامی شعور بیدار کرنے کیلئے واکس بھی منعقد کی جائیں گی نیزبلڈ کیمپس بھی لگائے جائیں گے جہاں شہری تھیلا سیمیا اورخون کی کمی کا شکار دیگر مریضوں کے علاوہ حادثات میں زخمی ہونیوالے افراد کیلئے خون کے عطیات فراہم کریں گے۔عالمی ادارہ صحت، محکمہ صحت، پاکستان میڈیکل ایسوسی ایشن، اسلامک میڈیکل ایسوسی ایشن، بلڈ ڈونرز ایسوسی ایشن، علی زیب فانڈیشن، تھیلا سیمیا بلڈ ڈونیشن سینٹرز اور دیگر متعلقہ تنظیموں کے زیر اہتمام تعلیمی اداروں، بڑی فیکٹریوں اور پبلک مقامات پر خون کے عطیات جمع کرنے کی بھی مہم چلائی جائیگی۔ فیصل آباد میڈیکل یونیورسٹی اور الائیڈ ہسپتال فیصل آباد کے ماہرین طب نے بلڈ ڈونرز ڈے کے سلسلہ میں بتایاکہ خون کا عطیہ دینا انسانی صحت کیلئے مفید ثابت ہوتا ہے تاہم اس کیلئے وقت، عمر اور حالات حاضرہ کی بعض حدود و قیود پر عملدرآمد ضروری ہے۔انہوں نے بتا یا کہ ورلڈ بلڈ ڈونرزڈے کے دن کارل لینڈ اسٹینر کی سالگرہ بھی منائی جاتی ہے جس نے خون میں اے، بی، او بلڈ گروپس سسٹم دریافت کر کے نوبل پرائز حاصل کیا۔انہوں نے کہا کہ میڈیکل ایمر جنسی، ٹراما کیسز، ٹریفک حادثات، خون کی کمی کے شکار خواتین و بچوں، کینسر کے مریضوں، سیکل سیل انیمیا، تھیلا سیمیا، ہیمو فیلیا اور دیگر امراض میں مبتلا مریضوں کو خون کی تبدیلی و بلڈ ٹرانسفیوژن کی ضرورت ہوتی ہے جن کیلئے خون کے عطیات دینا ہر محب وطن شخص کا فرض ہے۔