لاہور (ڈیسک) سابق وزیراعلیٰ پنجاب چوہدری پرویز الہٰی نے نگراں حکومت کے اقدامات کے خلاف عدالت سے رجوع کرنے کا فیصلہ کرلیا۔
لاہور میں پرویز الہٰی سے قانونی ماہرین کی ٹیم نے ملاقات کی، وکلاء میں محسن مرتضیٰ، خبیب زمان، محمد وسیم ودیگر شامل تھے۔ ملاقات کے دوران نگراں حکومت کے حالیہ اقدامات، ترقیاتی پروجیکٹ رکوانے اور سیاسی مخالفین کی گرفتاریوں سے متعلق مشاورت کی گئی۔ اس موقع پر سیکریٹری پنجاب اسمبلی محمد خان بھٹی کی گرفتاری اور ان کی رہائش گاہ پر چھاپے کی مذمت کی گئی۔ملاقات میں فیصلہ کیا گیا کہ نگراں حکومت کے اقدامات کے خلاف عدالت سے رجوع کیا جائے گا۔ چوہدری پرویز الہٰی نے کہا کہ نگران حکومت چادر اور چار دیواری کا تقدس پامال کر رہی ہے، نگراں سیٹ اپ انتخاب کو پس پشت ڈال کر انتقامی کارروائیوں میں مصروف ہے۔ انہوں نے کہا کہ پی ڈی ایم کو انتقام کے ایجنڈے کے سوا کوئی اور کام ہی نہیں، شہباز شریف نے معیشت تباہ کرکے رکھ دی، شہباز شریف کا صرف شعبدہ بازی کا تجربہ ہے، ان کی ناقص گورننس دنیا نے دیکھ لی۔