اسلام آباد(ڈیسک)رواں مالی سال کے پہلے 10 ماہ کے دوران نجی شعبہ کو قرضوں کی فراہمی میں 43 فیصد اضافہ ہوا ہے۔

سٹیٹ بینک آف پاکستان کے اعدادوشمار کے مطابق جاری مالی سال میں جولائی تا اپریل 21۔ 2020 کے دوران بینکوں اور مالیاتی اداروں کی جانب سے نجی شعبہ کو 454.5 ارب روپے کے قرضہ جات فراہم کیے گئے ہیں جبکہ گزشتہ مالی سال میں جولائی تا اپریل 20۔ 2019 کے دوران شعبہ کو قرضوں کی فراہمی کا حجم 318.4 ارب روپے رہا تھا۔ اس طرح گزشتہ مالی سال کے مقابلہ میں رواں مالی سال کے ابتدائی دس مہینوں کے دوران بینکوں اور مالیاتی اداروں کی طرف سے نجی شعبہ کو قرضوں کے اجرا میں 136.1 ارب روپے یعنی 43 فیصد اضافہ ریکارڈ کیا گیا ہے۔ واضح رہے کہ اس دوران روایتی بینکاری کے شعبہ کی طرف سے نجی شعبہ کو قرضوں کی فراہمی میں 69.8 ارب روپے کے اضافہ سے قرضوں کا اجرا 145.6 ارب روپے کے مقابلہ میں 215.4 ارب روپے تک بڑھ گیا۔ مزیدبرآں اسلامک بینکنگ کے شعبہ کی جانب سے نجی شعبہ کو قرضوں کی فراہمی میں 46.3 ارب روپے اضافہ ہوا ہے اور قرضوں کی فراہمی 57.4 ارب روپے کے مقابلہ میں 103.7 ارب روپے تک بڑھ گئی۔