لاہور (ڈیسک) چیئرمین پاکستان تحریک انصاف عمران خان نے میڈیکل رپورٹ تیار اور جاری کرنے والے ڈاکٹرز کو بھی قانونی نوٹس بھجوا دیا۔
عمران خان کے وکیل بیرسٹر محمد احمد کی جانب سے پروفیسر ڈاکٹر رضوان تاج کو 10 ارب روپے کے ہرجانے کا نوٹس بھجوا دیا گیا ہے۔
عمران خان کی جانب سے بھجوائے گئے نوٹس میں کہا گیا ہے کہ ڈاکٹر رضوان سے جعلی اور من گھڑت میڈیکل رپورٹ تیار کرنے پر 10 ارب روپے کا ہرجانہ ادا کرنے کا مطالبہ کرتا ہوں۔
نوٹس میں کہا گیا ہے کہ ڈاکٹر رضوان عمران خان سے غیر مشروط معافی مانگیں اور قومی و بین الاقوامی میڈیا میں نشر کریں، پروفیسر ڈاکٹر رضوان 14روز میں معافی مانگیں ورنہ قانون کا سامنا کرنے کیلیے تیار رہیں۔
نوٹس میں کہا گیا ہے کہ ڈاکٹر رضوان کے خلاف ہتک عزت، دیوانی اور فوجداری قوانین کے تحت کارروائی کی جائے گی۔
نوٹس کے متن کے مطابق جعلی میڈیکل رپورٹ کی تیاری و اجراء پر ڈاکٹر رضوان کے خلاف مقدمہ درج کروایا جائے گا اور پاکستان میڈیکل اینڈ ڈینٹل کونسل سے بھی رجوع کیا جائے گا۔