اسلام آباد (ڈیسک) وزیراعظم شہباز شریف نے میانوالی کے تھانہ مکڑوال پر دہشت گردوں کا حملہ ناکام بنانے پر پنجاب پولیس کو شاباش دی ہے ۔
بدھ کو وزیر اعظم آفس کے میڈیا سیل سے جاری بیان میں وزیر اعظم نے کہا کہ دہشت گردوں کو مار بھگانے والے پنجاب پولیس کے افسران اور جوانوں کو خراج تحسین پیش کرتا ہوں، پولیس دہشت گردی اور جرائم کے خاتمے میں ہمارا قابل فخر ہراول دستہ ہے۔ دہشت گردوں کے خلاف پوری قوم اور ادارے متحد اور یک آواز ہیں۔ وزیر اعظم نے کہا کہ انسداد دہشت گردی میں پنجاب پولیس اور سی ٹی ڈی کے کردار اور جذبے پرپوری قوم کو فخر ہے۔پولیس اور سی ٹی ڈی کو مزید مظبوط اور جدید ہتھیاروں سے لیس کریں گے۔پوری قوم دہشت گردی کے خاتمے کےلیے اپنی بہادر فورسز کے ساتھ ہیں۔ وزیر اعظم نے غیرمعمولی بہادری کا مظاہرہ کرنے والے پولیس افسران اور جوانوں کو انعام اور تعریفی اسناد دینے کا اعلان کیا ہے۔ واضح رہے کہ میانوالی میں مکڑوال پولیس اسٹیشن پر بھاری ہتھیاروں سے لیس کالعدم تحریک طالبان پاکستان (ٹی ٹی پی) کے عسکریت پسندوں کے گروپ نے حملہ تاہم پولیس نے جوابی کارروائی کرتے ہوئے حملے کو ناکام بنا دیا اور دہشت گرد بھاگنے پر مجبور ہوگئے۔