پشاور (ڈیسک) ترجمان خیبرپختونخوا حکومت بیرسٹر سیف نے پی ڈی ایم سربراہ مولانا فضل الرحمان کو بھارتی فلموں کا دلدادہ قرار دے دیا۔بیرسٹر سیف نے عمران خان سے متعلق مولانا فضل الرحمان کے بیان پر ردعمل کا اظہار دیتے ہوئے کہا کہ جس طر ح وہ شاہ رخ خان اور سلمان خان کے حوالے دیتے ہیں اس سے تو واضح ہوتا ہے کہ وہ بھارتی فلموں کے گرویدہ ہیں اور اس سے خوب لطف اندوز ہوتے ہیں۔ بیان میں ان کا کہنا تھا کہ سابق وزیراعظم پرفائرنگ کا مقدمہ کئی دن تک درج نہ ہونا شہباز حکومت کی نااہلی ہے، سپریم کورٹ نہ جاتے تو تاحال ایف آئی آر ہوا میں لٹکی ہوتی۔ انہوں نے کہا کہ وزیراعظم اور وزیر داخلہ سمیت دیگر وزرا صرف پریس کانفرنسز کرتے رہے جبکہ حکومتی عہدیدار تفتیشی افسر بن کر اس کیس پر رائے دیتے رہے اور ملک کے فوجداری قانون کا مذاق اڑایا گیا۔