You are currently viewing ملک کو الیکشن نہیں استحکام کی ضرورت ہے، خواجہ سعد رفیق

ملک کو الیکشن نہیں استحکام کی ضرورت ہے، خواجہ سعد رفیق

لاہور (ڈیسک) وفاقی وزیر ریلوے خواجہ سعد رفیق نے کہا ہے کہ آج ملک کو الیکشن کی نہیں استحکام کی ضرورت ہے۔ منگل کو احتساب عدالت میں پیشی کے موقع پر میڈیا سے گفتگو کرتے ہوئے انہوں نے کہا کہ چیئرمین پی ٹی آئی عمران خان کے سہولت کار ایک ایک کرکے چلے گئے، اب نہ جہاز ہے نہ جہاز چلانے والے ہیں، آج عمران خان اکیلے رہ گئے ہیں اور ان کے لانگ مارچ کی حقیقت ساری قوم نے دیکھ لی ہے۔ وفاقی وزیر نے کہا کہ عمران خان کے ساتھ کوئی نہیں ہے،اسمبلیاں بنانا اور توڑنا کو ئی کھیل نہیں ہے، انتخابات کرانے کے لیے پیسے چاہئیں، اس لیے جہاں آپ کی حکومتیں ہیں وہیں کام کریں۔ انہوں نے کہا کہ ہماری 2013 اور 2018 کی کارکردگی کا عمران خان حکومت کے 4سال سے موازنہ کریں،ادارے تباہ کردیے گئے، ان 8 ماہ میں تو ہم آگ بجھانے کی کوشش کر رہے ہیں، اللہ کا شکر ہے کہ ملک ڈیفالٹ ہونے سے بچ گیا۔ وفاقی وزیر نے کہا کہ نیب کو ختم کرکے احتساب کا نیا ادارہ بنانا چاہیے۔ اپنے خلاف زیر سماعت کیس کا ذکر کرتے ہوئے خواجہ سعد رفیق نے کہا کہ ہم پر سیاسی مخالفت کے باعث مقدمات بنائے گئے، جنہوں نے عمرا ن خا ن کو زمین سے اٹھا کر آسمان پر بٹھایا،اب انہیں برا بھلا کہتے ہیں۔ انہوں نے کہا کہ پنجاب کو پہلے عثمان بزدار لوٹ رہے تھے اب موجودہ حکمران لوٹ رہے ہیں۔

نیوز پاکستان

Exclusive Information 24/7