لاہور (ڈیسک) پاکستان فلم انڈسٹری کے معروف اداکار ببرک شاہ کا کمسن بیٹاپانی کے ٹینک میں ڈوب گیا۔ اداکار نے افسوسناک خبر اپنے فیس بک اکاؤنٹ پرمداحوں کو دی، انہوں نے بیٹے زاویار شاہ کی تصاویر شیئر کرتے ہوئے لکھا کہ وہ اب دنیا میں نہیں رہا۔ ببرک شاہ نے لکھا کہ ”میرے تمام بیٹوں میں یہ سب سے زیادہ ذہین اور بہترین تھا، اللہ اس کی مغفرت فرمائے، میں اسے ہمیشہ یاد کرتا رہوں گا یہاں تک کہ ہماری ملاقات دوبارہ ہو“۔ اداکار نے بیٹے کے لیے دعا کرنے والے مداحوں سے اظہار تشکر بھی کیا۔ میڈیا رپورٹس کے مطابق ببرک شاہ نے تصدیق کی ہے کہ بیٹے کی موت پانی کے ٹینک میں ڈوبنے کے باعث ہوئی۔