لاہور (ڈیسک) پاکستان تحریک انصاف کی رہنما یاسمین راشد کی فوٹو گرامیٹرک فارنزک رپورٹ منظر عام پر آگئی۔
آئی جی پنجاب ڈاکٹر عثمان انور نے کہا ہے کہ فوٹو گرامیٹرک ٹیسٹ کی فارنزک رپورٹ کے مطابق یاسمین راشد ہی مشتعل احتجاج کی سربراہی کر رہی تھیں۔
آئی جی پنجاب نے کہا کہ ہم نے عدالت سے درخواست کی کہ یاسمین راشد کی آواز کی ریکارڈنگ، فوٹو گرامیٹرک ٹیسٹ اور فون کالز کی تصدیق کے لیے ریمانڈ دیا جائے لیکن عدالت نے انہیں بری کر دیا۔
نجی ٹی وی کے پروگرام میں گفتگو کرتے ہوئے ایس ایس پی انوش مسعود چوہدری نے کہا کہ 10 مئی کو یاسمین راشد کو گواہ کے بیان پر ضمنی ایف آئی آر میں شامل کیا گیا۔
یاد رہے کہ لاہور کی انسداد دہشت گردی عدالت نے جسمانی ریمانڈ کے لیے پولیس کی استدعا مسترد کرتے ہوئے پی ٹی آئی پنجاب کی صدر ڈاکٹر یاسمین راشد کو جناح ہاؤس حملہ کیس سے بری کر دیا تھا۔