کراچی (ڈیسک) پاکستان کرکٹ بورڈ کے سابق چیئرمین رمیز راجا کا کہنا ہے کہ محمد رضوان کو بلاوجہ نائب کپتانی سے ہٹایا گیا، پاکستان کے لیے پرفارمنس دینے یا کھیلنے میں رضوان سے بڑا سپاہی کوئی نہیں۔
نیوزی لینڈ کے خلاف پہلے ون ڈے میں فتح کے بعد یوٹیوب چینل پر کی گئی گفتگو میں رمیز راجا نے کہا کہ وائٹ بال کرکٹ میں اچھی پرفارمنس کے باوجود کپتان بابر اعظم کو بے معنی تنازعات میں دھکیلا جا رہا ہے۔ انھوں نے قومی کھلاڑیوں کی تعریف کی اور کہا کہ پہلے ون ڈے میں بابر اور رضوان دونوں بہت پریشر میں تھے، ٹیسٹ سیریز کے بعد بابر کی کپتانی پر خوامخواہ پریشر ڈالاگیا، اس طرح کی چیزوں سے ٹیم کا ماحول خراب ہو جاتا ہے۔ انہوں نے کہا کہ پریس کانفرنسز کے دوران بابر اعظم سے مشکل سوالات پوچھے جا رہے ہیں، انھیں بے معنی تنازعات میں دھکیلا جا رہا ہے۔رمیز راجا نے کہا کہ 2 سالہ ٹیم کی پرفارمنس کی خاصیت یہ تھی کہ اس ٹیم نے تنازع سے خود کو بچا کر رکھا ہوا تھا، ساتھ ہی یہ ٹیم ایک کمبی نیشن کے ساتھ میدان میں اترتی رہی ہے، بابر اعظم نے نیوزی کے خلاف پہلے ون ڈے میں پریشر کے باوجود اچھی اننگز کھیلی۔ محمد رضوان کو نائب کپتانی سے ہٹانے کے فیصلے پر سابق چیئرمین پی سی بی کا کہنا تھا کہ رضوان کو خوامخواہ نائب کپتانی سے ہٹایا گیا، پاکستان کے لیے پرفارمنس دینے یا کھیلنے میں رضوان سے بڑا سپاہی کوئی نہیں، میرے خیال سے یہ ایک بے تکا سا فیصلہ تھا جس سے ٹیم پر پریشر بڑھ جاتا ہے۔