اسلام آباد (ڈیسک) متحدہ عرب امارات کے صدر نے پاکستان کے 2 ارب ڈالر کے قرض کو اوور رول کرنے اور ایک ارب ڈالر اضافی قرض دینے کا اعلان کردیا۔
وفاقی وزیر اطلاعات مریم اورنگزیب نے ٹوئٹ میں بتایا کہ وزیراعظم شہباز شریف نے ابوظبی میں متحدہ عرب امارات کے صدر شیخ محمد بن زاید النہیان سے ملاقات کی جس میں دونوں رہنماؤں نے باہمی دلچسپی کے امور پر تبادلہ خیال کیا جبکہ اس موقع پر متحدہ عرب امارات کے صدر نے 2 ارب ڈالر کے قرض کو رول اوور کرنے اور ایک ارب ڈالر اضافی قرض دینے کا اعلان کیا۔
شیخ محمد بن زاید نے وزیراعظم شہباز شریف کا ابوظبی میں خیرمقدم بھی کیا اور پاکستان کی ترقی و خوشحالی کی خواہش کا اظہار کیا۔ شیخ محمد بن زاید نے دونوں ممالک میں تاریخی تعلقات اور یو اے ای میں پاکستانیوں کی گرانقدر خدمات کی تعریف بھی کی۔
