کینبرا (ڈیسک) طالبان کی جانب سے لڑکیوں کی تعلیم اور ملازمت پر پابندی کے باعث آسٹریلیا اور افغانستان کے درمیان ون ڈے کرکٹ سیریز ختم کردی گئی۔
کرکٹ آسٹریلیا کا کہنا ہے کہ آسٹریلیا اور افغانستان کے درمیان ون ڈے کرکٹ سیریز مارچ میں شیڈول تھی تاہم افغانستان میں طالبان کی جانب سے لڑکیوں کی تعلیم اور ملازمت ، خواتین اور لڑکیوں کو پارکس اور جِم جانے پر پابندی کی وجہ سے ون ڈے کرکٹ سیریز ختم کی گئی۔ کرکٹ آسٹریلیا کے مطابق افغانستان کے خلاف ون ڈے سیریز کے معاملے پر حکومت سے طویل مشاورت کے بعد فیصلہ کیا گیا ۔ کرکٹ آسٹریلیا کے مطابق اس وقت سیریز کھیلنا ممکن نہیں۔ رپورٹس کے مطابق دونوں ٹیموں کے درمیان یہ سیریز آئی سی سی سپر لیگ کا حصہ ہے جو متحدہ عرب امارات میں شیڈول تھی۔یاد رہے کہ افغانستان میں خواتین پر حال ہی میں کئی پابندیاں عائد کی گئی ہیں۔