بیروت (ڈیسک) لبنان میں بحریہ نے شہری دفاع کے تعاون سے ڈوبتی کشتی سے 27شامی تارکین کو بچا لیا ہے۔
اے ایف پی کے مطابق لبنانی فوج کے ترجمان نے بیان میں کہا ہے کہ لبنانی بحریہ شکا کے ساحل کے قریب ڈوبنے والی ربڑ کی کشتی پر سوار غیر قانونی تارکین کو شہری دفاع کے تعاون سے بچانے میں کامیاب رہی۔
لبنانی فوجی اہلکار نے نام ظاہر نہ کرنے کی درخواست کے ساتھ کہا کہ ہمیں پریس سے بات کرنے کی اجازت نہیں تاہم انہوں نے اے ایف پی کو بتایا کہ تمام تارکین وطن شامی باشندے ہیں۔
انہوں نے کہا کہ لبنان سے یورپ پہنچنے کی کوشش کرنے والے تارکین وطن عام طور پر 175کلومیٹر کے اس بحری راستے سے مشرقی بحیرہ روم کے جزیرے قبرص کی طرف جاتے ہیں۔
سیکیورٹی فورسز نے بتایا ہے کہ ہفتے کے روز ایک لبنانی اسمگلر کو 42شامی باشندوں کے ہمراہ اس وقت گرفتار کیا گیا جب وہ ایک گاڑی میں سوار تھا۔
قبل ازیں جمعرات کو فوج ذرائع سے معلوم ہوا ہے کہ گذشتہ ہفتے لبنان کی شام کے ساتھ غیر محفوظ سرحد کے قریب تقریبا ایک ہزار غیر قانونی تارکین کو سرحد عبور کرنے سے روکا ہے۔
لبنان کی فوج باقاعدگی سے سمندری راستے سے سمگلنگ کی کارروائیوں کو ناکام بناتی ہے اور اسمگلروں اور آنے والے تارکین وطن دونوں کو گرفتار بھی کرتی ہے۔