اسلام آباد (ڈیسک) ورلڈ ایتھلیکٹس چیمپئن شپ میں ملک کا نام روشن کرنے والے قومی ہیرو ارشد ندیم کو صادق سنجرانی کی جانب سے 10لاکھ کا انعام دے دیا گیا۔
چیئرمین سینیٹ صادق سنجرانی سے قومی جیولن ہیرو ارشد ندیم نے ملاقات کی، انھیں سرکاری طور پر پارلیمنٹ ہائوس مدعو کیا گیا تھا، چیئرمین سینیٹ نے ارشد ندیم کو ورلڈ ایتھلیٹیکس چیمپئن شپ میں سلور میڈل جیتنے پر مبارک باد پیش کی۔
اس موقع پر صادق سنجرانی نے کہا کہ کامن ویلتھ گیمز اور حالیہ ورلڈ ایتھلیٹیکس چیمپئن شپ میں ارشد ندیم کی کارکردگی انتہائی شاندار رہی۔
انھوں نے کہا کہ آپ نے اپنی کارکردگی سے پاکستان کا نام روشن کیا، آپ پاکستان کا فخر، قومی ہیرو ہیں، محنت جاری رکھیں اور پاکستان کا نام مزید روشن کریں، ہم آپ کی معاونت کرتے رہیں گے۔
قومی ایتھلیٹ ارشد ندیم نے اس مقام تک پہنچنے کیلئے اپنی جدوجہد کے بارے میں چئیرمین سینیٹ کو آگاہ کرتے ہوے حوصلہ افزائی پر ان کا شکریہ ادا کیا۔
واضح رہے کہ سلور میڈل جیتنے پر چیئرمین سینیٹ نے ارشد ندیم کی شاندار کارکردگی پر دس لاکھ روپے انعام کا اعلان کیا تھا۔