قاہرہ(ڈیسک)چین کے مشرقِ وسطی کے امور کے خصوصی ایلچی گونگ شیاؤ شینگ نے کہا کہ فلسطین اور اسرائیل کو خونریز تصادم کو فوری طور پر ختم کرنا چاہیے۔ فلسطین اسرائیل مسائل کے حل کا واحد راستہ مذکرات اور بات چیت ہے۔
چائنا ریڈیو انٹرنیشنل کے مطابق گونگ شیاؤ شینگ نے مصر کے دورے کے دوران قاہرہ میں منعقدہ ایک نیوز بریفنگ میں کہا کہ ان کے موجودہ دورہ فلسطین ، اسرائیل اور مصر کا مقصد فلسطین اور اسرائیل کے درمیان موجود کشیدہ صورتحال اور مشرق وسطی کے دیگر اہم مسائل پر متعلقہ فریقوں کے ساتھ تبادلہ خیال کرنا ہے۔ فلسطین ، اسرائیل اور مصر نے مشرق وسطی میں قیام امن کے عمل میں چین کی نئی کوششوں کو سراہا ہے۔چینی ایلچی نے کہا کہ چین فلسطین کی کشیدہ صورتحال پر نظر رکھے ہوئے ہے ۔ چین اس موقف پر قائم ہے کہ عالمی برادری دو ریاستی فارمولے پر قائم رہتے ہوئے اقوام متحدہ کی متعلقہ قراردادوں اور عرب امن تجاویز کے مطابق فلسطین کے مسئلے کے سیاسی حل کے لئے تعمیری کردار ادا کرے۔
