پیرس (ڈیسک)  فرانسیسی میگزین چارلی ہیبڈو نے ایک مرتبہ پھر متنازع کارٹون شائع کیا ہے جس میں ترکیہ اور شام کے زلزلہ متاثرین کا تمسخر اڑایا گیا ہے۔
غیر ملکی خبر رساں ادارے الجزیرہ کے مطابق آرٹسٹ پیئرک جوئن کی ڈرائنگ میں ملبے کے ڈھیر کے درمیان منہدم عمارتوں کو دکھاتے ہوئے لکھا گیا ہے کہ یہاں ’’ٹینکس بھیجنے کی ضرورت نہیں ہے۔‘‘ چارلی ہیبڈو کے حالیہ کارٹون پر سوشل میڈیا صارفین پر غم و غصہ پایا جاتا ہے۔ صارفین نے فرانسیسی میگزین کو شدید تنقید کا نشانہ بنایا ہے۔

سوشل میڈیا صارفین کا کہنا تھا کہ کارٹون میں اس سانحے کا مذاق اڑایا گیا جس نے دو ممالک کے لاکھوں لوگوں کو متاثر کیا ہے۔ سوشل میڈیا صارفین نے اس ڈرائنگ کو قابل نفرت، شرمناک، بغاوت اور نفرت انگیز تقریر کے مترادف قرار دیا۔ ایک خاتون صارف نے لکھا کہ وہ میگزین کے لیے اپنی حمایت واپس لے رہی ہیں۔ ایک اور صارف نے لکھا کہ کارٹون میں چارلی ہیبڈو کی حقیقی روح کو دکھایا گیا ہے جبکہ ایک صارف نے لکھا کہ اس میگزین کی آمدنی کا واحد ذریعہ اسلامو فوبیا ہی ہے۔ امریکی مسلمان اسکالر عمر سلیمان نے لکھا کہ ہزاروں مسلمانوں کی موت کا مذاق اڑانا اس بات کی انتہا ہے کہ فرانس نے ہمیں ہر طرح سے غیر انسانی تصور کیا ہے۔ یاد رہے کہ ترکیہ اور شام میں آنے والے 7.8 شدت کے زلزلے سے اب تک جاں بحق افراد کی تعداد 16 ہزار سے تجاوز کرچکی ہے۔