اسلام آباد (ڈیسک) مسلم لیگ (ن) کے مرکزی رہنما طلال چوہدری کا کہنا ہے الیکشن بھرپور طریقے سے الیکشن لڑیں گے لیکن عام انتخابات آزاد کشمیر کے ضمنی الیکشن اور کراچی میں میئر کے الیکشن کی طرح نہیں ہونے چاہئیں۔
نجی ٹی وی کے پروگرام میں گفتگو کرتے ہوئے طلال چوہدری کا کہنا تھا عدم اعتماد کی تحریک پیپلز پارٹی کی تجویز پر لائی گئی تھی، مسلم لیگ ن اور جے یو آئی تو نئے انتخابات چاہتی تھیں۔
چیئرمین پیپلز پارٹی کے سوات جلسے میں تقریر پر ردعمل دیتے ہوئے طلال چوہدری کا کہنا تھا بلاول کا چیلنج ہمیں قبول ہے لیکن عام انتخابات آزاد کشمیر اور میئر کراچی کے الیکشن کی طرح نہیں ہونے چاہئیں۔
آزاد کشمیر الیکشن پر تحفظات ہیں جبکہ کراچی کے الیکشن پر بھی سوالات اٹھ رہے ہیں، الیکشن ایسا ہونا چاہیے جس پر انگلیاں نہ اٹھ سکیں۔
ان کا کہنا تھا جہاں پر پیپلزپارٹی کی حکومت ہے وہاں الیکشن پر ہمارے اعتراضات موجود ہیں، آنے والے الیکشن میں سوالات نہیں اٹھنے چاہئیں، انتخابات صاف شفاف ہونے چاہئیں اور اتحادی جماعتوں کو مل کر ایسا ماحول اور الیکشن کرانا چاہیے جس کی مثال نہ ملتی ہو۔
مسلم لیگ ن کے رہنما نے دعویٰ کیا کہ پنجاب میں ہماری لینڈ سلائیڈ وکٹری ہوگی،
بلاول بھٹو زرداری کی جانب سے بجٹ منظور نہ ہونے سے متعلق سوال پر طلال چوہدری کا کہنا تھا بجٹ کابینہ کی منظوری کے بعد پیش کیا جاتا ہے، کمیٹی کو بجٹ پر بریفنگ دی جاتی ہے، ہر جگہ پر پیپلزپارٹی کی مشاورت ہوتی ہے۔
سیلاب زدگان کے لیے وزیراعظم شہباز شریف زیادہ متحرک نظر آئے ہیں، بجٹ پر ابھی بھی کسی کو اعتراض ہو گا تو وزیراعظم دیکھیں گے۔
انہوں نے مزید کہا کہ ن لیگ کے ہر شخص کی خواہش ہے کہ نواز شریف چوتھی بار وزیراعظم بنیں۔