اسلام آباد (ڈیسک) صدر عارف علوی نے پاکستان تحریک انصاف کے چیئرمین عمران خان کو فوج پر تنقید سے خبردار کردیا۔ ذرائع کے مطابق صدر مملکت نے نئے آرمی چیف کی تقرری کے بعد عمران خان کو متنبہ کرتے ہوئے کہا کہ وہ فوری طور پر پارٹی رہنماؤں اور سوشل میڈیا ٹیم کو فوج کے خلاف تنقید سے باز رکھیں۔ ذرائع کے مطابق صدر نے عمران خان کو بتایاکہ فوج کی عزت اس کی ریڈ لائن ہے اسے پار نہ کیا جائے۔ذرائع کے مطابق مذکورہ تنبیہ کے بعد ”پی ٹی آئی پارلیمانی پارٹی “ کے نام سے چلنے والے واٹس ایپ گروپ میں عمران خان کا پیغام شیئر کیا گیا جس میں کسی بھی فورم پر نئے آرمی چیف پر تنقید سے باز رہنے کا کہا گیا اور مذکورہ ہدایت پر سختی سے عمل کی ہدایت کی گئی ہے۔ دریں اثناء پی ٹی آئی کے ترجمان فواد چوہدری نے کہا ہے کہ نئی فوجی اسٹیبلشمنٹ اور آرمی چیف پر تنقید نہیں ہوگی، ادارے کے ساتھ لڑائی نہیں کی جاسکتی۔