لاہور (ڈیسک) پاکستان پیپلز پارٹی کے رہنما قمر زمان کائرہ نے کہا ہے کہ صدر مملکت عارف علوی نے عمرانی جیالا بننے کی کوشش کی۔
لاہور میں پریس کانفرنس میں قمر زمان کائرہ نے کہا کہ الیکشن کروانے کا اعلان صدر یا حکومتیں نہیں کرتیں، صدر کا کوئی انتظامی اختیار نہیں، صدر نے جو اختیار استعمال کیا ہے اس کا کوئی وجود نہیں۔انھوں نے کہا کہ الیکشن کمیشن ایک بااختیار ادارہ ہے، الیکشن کروانے کی صوابدید مکمل طور پر الیکشن کمیشن کے پاس ہے۔ جو اختیار صدر کے پاس نہیں تھا اس کو استعمال کرنے کی کوشش کی گئی، کل صدر پاکستان نے آئین توڑا اور آئین سے کھلواڑ کیا ہے۔ قمر زمان کائرہ نے کہا کہ صدر نے ایسے ہی اختیار استعمال کیا جیسے سابق ڈپٹی اسپیکر قاسم سوری نے کیا تھا، جو اسٹیج ڈرامہ پہلے پلے ہوا تھا اب بھی ایسا ہوا ہے۔ پی پی رہنما نے کہا کہ صدر نے ایک مشاورتی اجلاس طلب کیا اور الیکشن کمیشن کو حکم دے دیا، وفاقی حکومت اور کابینہ فیصلے کرتی ہے، صدر اس پر عمل درآمد کرواتا ہے۔قمر زمان کائرہ نے کہا کہ جو صوبائی حکومت فیصلہ کرے گی گورنر اس پر عمل کرواتا ہے۔