کراچی (ڈیسک) سابق صدر آصف علی زرداری نے کہا ہے کہ بےنظیر بھٹو شہید کے مشن سے متعلق نیند میں بھی غفلت نہیں کر سکتا، سیاست میں محترمہ نے میری رہنمائی کی تھی۔
محترمہ بےنظیر بھٹو کے یومِ شہادت پر آصف زرداری نے اپنے پیغام میں کہا کہ اب شہید محترمہ بےنظیر بھٹو کی فلاسفی میری رہنمائی کر رہی ہے، آئین و جمہوریت کی خاطر بی بی کی طرح کسی نے مشکلات کا سامنا نہیں کیا۔انہوں نے کہا کہ محترمہ نے انتہائی بہادری، صبر اور برداشت سے آمروں کے خوف کا بت پاش پاش کیا، ہم میں وہ خون نہیں جو مشکلات کی آگ سے موم کی طرح پگھل جائے، جبر کے حالات سے گزر کر ہم کندن بنتے ہیں، یہی بی بی شہید نے سکھایا ہے۔آصف زرداری نے کہا کہ جمہوریت کا تسلسل محترمہ بےنظیر بھٹو شہید کا خوبصورت خواب تھا، الحمد للہ میں نے محترمہ شہید کے خواب کی تکمیل کر دی ہے۔ سابق صدر نے مزید کہا کہ انشاء اللہ موجودہ اسمبلیاں بھی اپنی مدت پوری کریں گی اور ملک مضبوط جمہوریت کے راستے پر گامزن ہو گا۔ آصف زرداری نے یہ بھی کہا کہ اداروں کا سیاست سے لاتعلقی اور آئین پر عمل کرنے کا اعلان بی بی شہید کے خواب کی تعبیر ہے۔