دمشق (ڈیسک) شام میں زلزلے کے بعد راجو جیل سے داعش کے20قیدی فرار ہو گئے۔
سعودی ذرائع ابلاغ کے مطابق جیل کے اہلکار نے بتایا کہ زلزلہ آنے کے بعد راجو جیل میں موجود قیدیوں نے بغاوت کرکے جیل کے کچھ حصوں پر قبضہ کر لیا اس دوران 20 قیدی فرار ہو گئے جن کے بارے میں خیال کیا جاتا ہے کہ وہ داعش کے جنگجو تھے۔
ان کا کہنا تھا کہ 7.8 شدت کے زلزلے) جس کے بعد خطے میں درجنوں آفٹر شاکس آئے) نے جیل کو نقصان پہنچایا اور دیواروں اور دروازوں میں شگاف پڑ گئے۔
برطانیہ میں قائم سیرین آبزرویٹری فار ہیومن رائٹس وار مانیٹر نے کہا ہے کہ وہ اس بات کی تصدیق نہیں کر سکتے کہ آیا قیدی فرار ہو گئے ہیں ،تاہم انہوں نے جیل میں بغاوت کی تصدیق کی ۔
حکومت اور امدادی کارکنوں نے بتایا کہ پیر کو شام بھر میں تباہ کن زلزلے( جس کا مرکز جنوب مغربی ترکیہ میں تھا )کے بعد 14 سو 44 افراد ہلاک ہوئے ہیں۔
وائٹ ہیلمٹس ریسکیو گروپ کے مطابق ملک کے شمال مغرب میں باغیوں کے زیر قبضہ علاقوں میں733 افراد ہلاک اور 21 سو سے زائد زخمی ہوئے ہیں۔