لاہور (ڈیسک) پاکستان تحریک انصاف کے رہنما شبلی فراز نے کہا ہے کہ پنجاب حکومت کاخط ملا کہ عمران خان کی پنجاب، کےپی کے کی سیکیورٹی واپس لے لی گئی ہے۔
پی ٹی آئی رہنما شبلی فراز نے زمان پارک میں میڈیا سےگفتگو کرتے ہوئے کہا کہ سابق وزیر اعظم کا حق ہوتا ہے کہ اسے سیکیورٹی ملے۔ انھوں نے کہا کہ گزشتہ ماہ قاتلانہ حملے کے باوجود کٹھ پٹلی حکومت استعمال ہو رہی ہے، ہم اس کی پوری ذمہ داری رانا ثناء اللہ پر ڈالتے ہیں، عمران خان کو کچھ ہوا تو اسکےذمہ دار راناثناء اللہ اور یہ کٹھ پتلی حکومت ہوگی۔ شبلی فراز نے کہا کہ آج سپریم کورٹ اور لاہور ہائی کورٹ میں پٹیشن دائر کی ہیں جس میں راجہ پرویز اشرف، الیکشن کمشن، پنجاب اور کےپی حکومت کو فریق بنایا گیا ہے۔ شبلی فراز نے کہا کہ الیکشن کمیشن نے ایسے شخص کو وزیر اعلی بنایا جس کاماضی داغ دار ہے، ان کی کابینہ بھی متنازع لوگوں پر مشتمل ہے۔ انہوں نے کہا کہ ان کی ہر حرکت ثابت کرے گی کہ یہ الیکشن کرانےکے حق میں نہیں، کےپی کے میں جو وزیر لگائے گئے ان کی اکثریت سیاسی ہے۔ انہوں نے کہا کہ الیکشن کی تاریخ نہ دے کر جو آئین شکنی کر رہے ہیں، اس پر آرٹیکل 6 لگتا ہے۔