اسلام آباد (ڈیسک) پاکستان کے ایوان بالا میں 9 مئی واقعات کے خلاف پاکستان تحریک انصاف کی پارلیمانی کمیٹی نے متفقہ قرارداد منظور کرلی۔
سینیٹ میں پی ٹی آئی کی پارلیمانی کمیٹی کا اجلاس ڈاکٹر شہزاد وسیم کی زیر صدارت ہوا۔
اجلاس میں منظور کی گئی متفقہ قرارداد میں 9 مئی کے واقعات کی پرزور مذمت کی گئی۔
قرارداد میں کہا گیا ہے کہ شہداء کی بے حرمتی، قومی املاک کو نقصان اور دفاعی تنصیبات پر حملے ناقابل قبول ہیں۔
قرارداد کے مطابق پاکستان کی سلامتی کو درپیش چیلنجز سے نبردآزما ہونے کے لیے مضبوط افواج ناگزیر ہے۔
پاکستان کے عوام اور افواج پاکستان میں محبت اور اعتماد کا رشتہ ہے لہٰذا ہر وہ عمل اور بیانیہ جو اس رشتے میں دراڑ ڈالے اس کو مسترد کرتے ہیں۔
قرارداد میں شہدا کے اہلخانہ سے بھرپور اظہار یکجہتی کرتے ہوئے 9 مئی واقعات کی شفاف تحقیقات اور مرتکب افراد کو قرار واقعی سزا دینے کا مطالبہ کیا گیا۔