کراچی (ڈیسک) سندھ پولیس کا سیکیورٹی اینڈ ایمرجنسی سروسز ڈویژن ایکسپو سینٹر میں بین الاقوامی دفاعی نمائش اور سیمینار (IDEAS) کے 11 ویں ایڈیشن میں شرکت کررہا ہے، بین الاقوامی نمائشی تقریب میں سندھ پولیس کی یہ پہلی شرکت ہے۔
ترجمان ڈی آئی جی سکیورٹی اینڈ ایمرجنسی سروسز ڈویژن کی جانب سے منگل کو جاری اعلامیہ کے مطابق اس تقریب میں پاکستان کی مسلح افواج، قومی اور بین الاقوامی دفاعی صنعتوں، OEMs، کاروباری افراد اور اعلی سطح کے قومی اور بین الاقوامی دفاعی وفود کی ایک بڑی تعداد شرکت کر رہی ہے۔ جدید طرز پر آئیڈیاز کے انعقاد کا مقصد دفاعی خریداروں اور فروخت کنندگان کو ایک موثر پلیٹ فارم فراہم کرنا ہے۔
سندھ پولیس ہال نمبر 8مارکی پاکستان پویلین میں اپنی خدمات کی نمائش کا مظاہرہ کر رہی ہے، جس میں محکمہ جدید پولیسنگ اور جدید ترین انفارمیشن ٹیکنالوجی کونظام میں شامل کرنے کی جانب اپنے سفر کی عکاسی کر رہا ہے۔ یہ جدید ترین ہتھیاروں اور کمیونیکیشن سسٹم سے لیس پیشہ ورانہ اور تربیت یافتہ سپیشل سکیورٹی یونٹ کے کمانڈوز پر مشتمل اسپیشل ویپن اینڈ ٹیکٹکس ٹیم(S.W.A.T) کی خدمات و خصوصیات کو بھی اجا گر کر رہا ہے۔
مہمانوں کو سندھ پولیس کی جانب سے مجرموں کو پکڑنے کے لیے حال ہی میں لانچ کی گئی تلاش ایپ کے بارے میں بھی بریفنگ دی جا رہی ہے۔اس موقع پر ڈی آئی جی سکیورٹی اینڈ ایمرجنسی سروسز ڈویژن ڈاکٹر مقصود احمد نے کہا کہ ماضی قریب میں سندھ پولیس خاص طور پرسکیورٹی اینڈ ایمرجنسی سروسز ڈویژن نے اپنی خدمات کے دائرہ کو وسیع کیا ہے اور جدید تکنیکس اور ٹیکنالوجی کو اپنایا ہے جس کو مد نظر رکھتے ہوئے سندھ پولیس کی قیادت نے نمائش میں اپنی خدمات کی خصوصیات کو پیش کرنے کا فیصلہ کیا ہے جس سے بین الاقوامی سطح پر پاکستانی پولیس کے مثبت تشخص اجاگر کرنے میں مدد ملے گی۔