دمام (ڈیسک) سعودی عرب سے تعلق رکھنے والی 70 سالہ معمر خاتون سلویٰ العمانی نے بیچلرز کی ڈگری مکمل کرلی۔
عرب میڈیا کی رپورٹ کے مطابق سلویٰ العمانی نے امام عبدالرحمٰن بن فیصل یونیورسٹی سے سوشیالوجی میں بی اے آنرز کی ڈگری حاصل کی۔
اس موقع پر خاتون نے اپنی جدوجہد کے بارے میں بھی بتایا۔
خاتون کے مطابق جوانی میں بیچلر کی ڈگری مکمل کرنے کے لیے یونیورسٹی میں داخلہ لیا تو اپنے لیے کیمسٹری کے مضمون کا انتخاب کیا تاہم جلد شادی ہونے کے سبب تعلیم چھوڑنا پڑی۔
سلویٰ العمانی نے 46 سال گزر جانے کے بعد 2016 میں دوبارہ تعلیم مکمل کرنے کا سوچا لیکن طویل وقفہ کے بعد ازسر نو تعلیم شروع کرنے میں انہیں کافی مشکلات پیش آرہی تھیں کیونکہ وہ اپنی گزشتہ تعلیمی اسناد بھی کھو چکی تھیں۔
بعد ازاں انہیں کسی طرح جامعہ میں داخلہ مل گیا جس کے بعد انہوں نے تعلیم مکمل کی۔
گریجویشن مکمل کرنے سے متعلق خاتون نے کہا کہ میری گریجویشن اور یونیورسٹی کے اسٹیج پر مجھے عزت دینے کا لمحہ متاثر کن اور لازوال ہے کیونکہ میں نے 46 سال تک اس کا انتظار کیا۔
سلویٰ العمانی کے مطابق یہ یاد میرے ذہن میں رہے گی جب تک زندہ رہوں گی۔