کراچی (ڈیسک) جماعت اسلامی کراچی کے امیر حافظ نعیم الرحمن نے پاکستان کرکٹ ٹیم کے سابق کپتان سرفراز احمد کی رہائش گاہ پر جاکر انہیں 4 سال بعد قومی ٹیم میں واپسی پر مبارک باد دی۔ انھوں نے سرفراز کی کیرئیر بیسٹ 118 رنز کی اننگز کھیلنے پر تعریف کی اور انھیں مٹھائی پیش کی۔
حافظ نعیم الرحمن نے کہا کہ جس طرح آپ نے کراچی ٹیسٹ میں پرفارم کیا، اللہ تعالی آپ کو بہت ساری خوشیاں دے اور آپ کی کارکردگی کو مزید بہتر بنائے۔
امیر کراچی جماعت اسلامی نے کہا کہ آپ نے ہمارے ملک اور شہر کا نام روشن کیا ہے، جس پر آپ مبارکباد کے مستحق ہیں، اللہ تعالی آپ کی کارکردگی کو مزید بہتر بنائے اور آپ کو مزید عزت سے نوازے۔
حافظ نعیم کا کہنا تھا کہ ہم سب کیلئے خوشی کامقام ہوتا ہے جب کوئی کھلاڑی پاکستان کیلئے پرفارم کرتا ہے، آپ کراچی کی عزت ہیں، جس پر سرفراز احمد نے حافظ نعیم کا شکریہ بھی ادا کیا۔
واضح رہے کہ سرفراز احمد کو 4 سال بعد قومی ٹیم کی پلیینگ الیون میں موقع ملا اور انہوں نے نیوزی لینڈ کے خلاف حالیہ2ٹیسٹ میچوں کی سیریز میں یکے بعد دیگرے تین نصف سینچریاں اور اپنے کیرئیر کی بہترین سنچری سمیت مجموعی طور پر 4 اننگز میں 335 رنز بنا کر اپنی کارکردگی سے سب کو حیران کر دیا ہے۔