ماسکو (ڈیسک) وال اسٹریٹ جرنل کے ماسکو بیورو میں کام کرنے والے امریکی رپورٹر کو روس نے جاسوسی کے الزام میں گرفتار کر لیا۔
خبرایجنسی کے مطابق امریکی رپورٹر ایون گرشکووچ کو گرفتاری کے بعد عدالت میں پیش کیا گیا، عدالت نے رپورٹر کو 29 مئی تک حراست میں رکھنے کا حکم جاری کر دیا۔
دریں اثناء امریکی محکمہ خارجہ نے امریکی رپورٹر کی گرفتاری پرتشویش کا اظہار کرتے ہوئے کہا ہے کہ صحافیوں اور میڈیا کے خلاف روس کے اقدامات قابل مذمت ہیں۔
امریکی وزیر خارجہ انٹونی بلنکن کا کہنا تھا کہ امریکی رپورٹر کے اخبار وال اسٹریٹ جرنل سے رابطے میں ہیں۔
وائٹ ہاؤس سے جاری بیان میں کہا گیا ہے کہ روسی حکومت کی جانب سے امریکی شہریوں کے خلاف کارروائیاں قابل قبول نہیں، بائیڈن انتظامیہ گرفتار رپورٹر کے خاندان اور روسی حکومت سے رابطے میں ہے۔
امریکی رپورٹر کی گرفتاری کے بعد وائٹ ہاؤس نے امریکی شہریوں کو فوری طور پر روس چھوڑ نے کا مشورہ دےدیا۔