کوئٹہ (نیوز ڈیسک) نگراں وفاقی وزیرداخلہ سرفراز بگٹی نے کہا ہے کہ بلوچستان میں دہشت گردی کے واقعات کے پیچھے بھارتی خفیہ ایجنسی “را” ہے، منصوبہ سازوں، سہولت کاروں اور دہشت گردوں کی نانی ایک ہے۔
کوئٹہ میں میڈیا سے گفتگو میں سرفراز بگٹی کا کہنا تھاکہ دہشت گردو ں نے 12 ربیع الاول کے دن معصوم لوگوں کو بیدردی سے قتل کیا۔
دہشت گردوں کے سہولت کاروں کا پیچھا کریں گے اور ان سے پاکستانیوں کے خون کے ایک ایک قطرے کا حسا ب لیا جائے گا۔
انھوں نے کہا کہ ہمیں معلوم ہے یہ کون ہے اور کہاں سے کررہا ہے، دہشت گردوں کے خلاف جس قسم کی فورس استعمال کرنا پڑی کریں گے، ہم اپنی رٹ کو ہر صورت قائم کریں گے۔
وزیر داخلہ کا کہنا تھاکہ پاکستان میں دہشت گردوں، ان کےسہولت کاروں کےلیے کوئی جگہ نہیں۔
ان کا کہنا تھا کہ دہشت گردی کے تمام واقعات کے پیچھے ”را“ ہے، ان کے بلوں سے نکال کر انہیں انجام تک پہنچائیں گے۔
انھوں نے جمعیت علمائے اسلام کے رہنما حافظ حمداللہ پر حملے کے ماسٹرمائنڈ کو ہلاک کرنے کا بھی انکشاف کیا۔