واشنگٹن ڈی سی (ڈیسک) امریکی خلائی ایجنسی ناسا نے سال نو پر سورج کی دلکش تصویر جاری کی ہے جس میں سورج سے آگ کی لپٹیں خارج ہوئے دیکھی جا سکتی ہیں۔
سماجی رابطوں کی ویب سائٹ انسٹا گرام پر ناسا کی جاری کردہ تصویر کے کیپشن میں بتایا گیا ہے کہ تصویر میں نظر آنے والے سورج کی عمر 4.5 بلین سال سے زیادہ ہے۔

ناسا نے نئے سال کی مبارکباد دیتے ہوئے انسٹا گرام پر لکھا ہے کہ زمین سے سورج 93 ملین میل (150 ملین کلو میٹر) دوری پر ہے۔ ناسا نے بتایا کہ سورج ہمارے نظام شمسی کے مرکز میں ہے جو اپنے 8 لاکھ 65 ہزار میل چوڑے کور اور 15 ملین ڈگری سینٹی گریڈ درجۂ حرارت کے ساتھ موجود ہے، یہ سورج کی کشش ثقل ہی ہے جو ہمارے نظام شمسی کے بڑے سے لے کر چھوٹے سیارے تک سب کو ایک خاص ترتیب میں رکھی ہوئی ہے۔ تصویر میں دیکھا جا سکتا ہے کہ سیاہ خلاء میں سرخ، نارنجی اور پیلے رنگ کے دھبوں میں سورج چمک اور گھوم رہا ہے۔ 16 گھنٹے قبل شیئر کردہ پوسٹ کو اب تک 12 لاکھ سے زائد مرتبہ پسند کیا جا چکا ہے۔