اقوام متحدہ (ڈیسک) اقوام متحدہ نے کہا ہے کہ جنگوں کی سب سے بڑی قیمت خواتین ادا کر رہی ہیں لیکن پھر بھی سفارتی محاذ پر ان کی نمائندگی بہت کم ہے۔
سعودی ذرائع ابلاغ کے مطابق خواتین کے عالمی دن کے موقع پر اقوام متحدہ کے شعبہ خواتین کی ایگزیکٹیو ڈائریکٹر سیما باہوس نے عالمی برادری سے دنیا بھر میں خواتین کے تحفظ اور حقوق کی فراہمی کے لیے کردار ادا کرنے کا مطالبہ کیا۔ انہوں نے سکیورٹی کونسل میں ’’خواتین، سلامتی اور امن‘‘کے عنوان سے ہونے والے اجلاس میں کہا کہ ہمیں یہ یاد کرنے کی ضرورت ہے کہ ہم امن کے حوالے سے بات چیت میں کوئی زیادہ تبدیلی لا سکے ہیں نہ ہی ان لوگوں کوروک سکے ہیں جو خواتین پر مظالم ڈھاتے ہیں۔
انہوں نے افغانستان کے حوالے سے بات کرتے ہوئے کہا کہ وہاں خواتین پر یونیورسٹیوں اور پارکس میں جانے پر پابندی لگائی گئی ہے جبکہ ملازمتوں سے بھی ہٹایا گیا ہے۔
روس۔یوکرین تنازعہ کے حوالے سے انھوں نے کہا کہ جنگ کی وجہ سے جن 80 لاکھ یوکرینی باشندوں کو ملک چھوڑنا پڑا ان میں سے 90 فیصد خواتین اور بچے ہیں جبکہ جو افراد اپنے ملک کے اندر ہی بے گھر ہوئے ان میں بھی 70 فیصد خواتین ہیں۔
انہوں نے عالمی رہنماؤں پر زور دیتے ہوئے کہا کہ وہ 2000 میں منظور ہونے والی اقوام متحدہ کی سلامتی کونسل کی تاریخی قراردادوں کے مطابق کام کریں، جن میں تنازعات کے حل اور خواتین کے حقوق پر زور دیا گیا ہے۔
اس موقع پر امریکی سفیر لنڈ تھامس گرین فیلڈ نے کہا کہ وہ سب کی توجہ دنیا میں خواتین اور لڑکیوں کے ساتھ ہونے والے جبر کی طرف مبذول کرانا چاہتی ہیں جیسا کہ ایران، افغانستان اور روس کے زیرقبضہ یوکرین کے علاقوں کے علاوہ دنیا میں دوسرے مقامات پر ہو رہا ہے۔
فرانسیسی نمائندہ مارلین سیچیپا جنہوں نے حال ہی میں اپنے ملک کے لیے ایکویلٹی منسٹر کے طور پر خدمات انجام دی ہیں نے کہا کہ جنگوں اور بحرانوں میں سب سے بڑی قیمت خواتین کو چکانا پڑتی ہے۔ انہوں نے یوکرین، صومالیہ اور دوسرے جنگ زدہ علاقوں کا ذکر کرتے ہوئے کہا کہ وہاں سب سے زیادہ خواتین متاثر ہو رہی ہیں اور باقاعدہ منصوبہ بندی سے انہیں جنسی زیادتی اور تشدد کا نشانہ بنایا جاتا ہے۔ انہوں نے خبردار کیا کہ جو ایسی چیزوں کے ذمہ دار ہیں، ان کو ایک روز اس کا جواب دینا پڑے گا۔