راولپنڈی (ڈیسک) پاک فوج کے شعبہ تعلقات عامہ کے ادارے (آئی ایس پی آر ) نے سوشل میڈیا پر جنرل باجوہ کے اثاثوں سے متعلق اعداد و شمار کو بددیانتی پر مبنی قرار دیا ہے۔
آئی ایس پی آر نے کہا کہ گمراہ کن اعداد و شمار بڑھا چڑھا کر پیش کیے گئے جو صرف مفروضے ہیں۔
ترجمان کے مطابق ایک خاص گروپ نے چالاکی اور بددیانتی سے جنرل باجوہ کے سمدھی اور ان کے خاندان کے اثاثوں کو آرمی چیف اور ان کے خاندان سے منسوب کیا ہے اور کہا ہے کہ یہ اثاثے گزشتہ چھ سال میں بنائے گئے۔
آئی ایس پی آر کا کہنا ہے کہ آرمی چیف اور ان کے خاندان کے تمام اثاثے ایف بی آر میں باقاعدہ ڈکلیئرڈ ہیں، وہ اور ان کا خاندان ٹیکس پیئر ہے اور ریٹرن فائل کرتے ہیں۔
ترجمان نے واضح کیا کہ پاکستان کے کسی بھی شہری کی طرح آرمی چیف اور ان کی فیملی اپنے اثاثہ جات سے متعلق ایف بی آر کے سامنے جواب دہ ہیں۔