اسلام آباد (ڈیسک) اسلام آباد ہائیکورٹ نے عمران خان کے خلاف خاتون جج کو دھمکانے پر توہین عدالت کیس کا تفصیلی فیصلہ جاری کردیا۔چیف جسٹس اسلام آباد ہائیکورٹ کی سربراہی میں 5 رکنی لارجر بینچ نے 16 صفحات پر مشتمل متفقہ فیصلہ جاری کیا، فیصلہ سابق چیف جسٹس اسلام آباد ہائیکورٹ اطہر من اللّٰہ نے تحریر کیا ہے۔ فیصلے میں جسٹس محسن اختر کیانی اور جسٹس بابر ستار نے اضافی نوٹ تحریر کیے ہیں۔ فیصلے میں کہا گیا ہے کہ عمران خان کے رویے، وضاحت، معافی اور ڈسٹرکٹ کورٹ جانے سے ان کی نیک نیتی ظاہر ہوتی ہے، عمران خان کی معافی سے مطمئن ہیں۔تفصیلی فیصلے میں کہا گیا ہے کہ کوئی وجہ نہیں کہ توہین عدالت کی کارروائی مزید چلائی جائے، عمران خان کے خلاف شوکاز نوٹس واپس لے کر کیس سے ڈسچارج کیا جاتا ہے۔ عدالتی فیصلے میں کہا گیا کہ ایک سیاسی لیڈر کی جانب سے ایسی تقریر کی توقع نہیں تھی۔ عمران خان عدالت میں پیش ہوئے اور اپنے الفاظ پر افسوس کا اظہار کیا، عمران خان خاتون جج کی عدالت بھی معافی مانگنے کیلیے گئے، عمران خان کے کنڈکٹ پر شک کا فائدہ نہ دینے کی کوئی وجہ نہیں۔ جسٹس محسن کیانی کے نوٹ میں کہا گیا کہ عمران خان پر فرد جرم عائد ہی نہیں ہوئی تھی، عمران خان کو معاف کیا گیا کہنا ہی عین انصاف ہے، عمران خان نے توہین کو تسلیم کرکے معافی کے عمل سے ختم کیا۔جسٹس بابر ستار نے بھی شک کا فائدہ دینے والے پیراگراف کی حد تک اختلاف کیا۔