دبئی (ڈیسک) بھارتی ٹینس اسٹار نے سوشل میڈیا پلیٹ فارم پر طویل جذباتی نوٹ کے ساتھ فروری میں ریٹائرمنٹ کا اعلان کردیا۔
بھارتی ٹینس اسٹار ثانیہ مرزا نے ریٹائرمنٹ کے اعلان میں اپنے 20 سالہ کیرئیر کی روداد پرستاروں کے ساتھ شیئر کر دی۔ ثانیہ مرزا نے انسٹاگرام پر طویل نوٹ میں اپنے کیرئیر کے دوران اہل خانہ اور پرستاروں کی جانب سے ملنے والے تعاون پر ان کا شکریہ بھی ادا کیا۔
انہوں نے یہ لکھا کہ وہ اپنی زندگی کا ایک نیا باب شروع کرنے کے لیے پُر عزم ہیں اور اب اپنا زیادہ تر وقت اپنے بیٹے کے ساتھ گزارنا چاہتی ہیں۔ انہوں نے بتایا کہ 30 سال قبل صرف 6 برس کی عمر میں ان کی والدہ انہیں نظام کلب ٹینس کورٹ تربیت حاصل کرنے کے لیے لیکر گئی تھیں لیکن کوچ نے یہ کہہ کر انکار کردیا تھا کہ ابھی وہ ٹینس سیکھنے کے لیے بہت چھوٹی ہیں، جس پر انہوں نے کوچ سے کیسے لڑائی کی اور پھر کس طرح انہیں ٹینس سیکھانے کے لیے آماد کیا اور پریکٹس کا آغاز کیا۔ اسی عمر میں انہوں نے ایک دن گرینڈ سلم کھیلنے اور اپنےملک کی نمائندگی کرنے کا خواب دیکھا تھااور اب گرینڈ سلم سے ہی اپنے کیرئیر کے سفر کا اختتام کرنے کا ارادہ رکھتی ہیں۔ انہوں نے مزید لکھا کہ اب اس مقام پر پہنچنے کے بعد جب میں پیچھے مڑکر دیکھتی ہوں تو مجھے 50 سےزائد بار کھیلنے اور کئی مرتبہ جیتنے کا موقع بھی ملا۔ انہوں نے اپنے ملک کے لیے تمغہ حاصل کرنے والے لمحات کو سب سے بڑا اعزاز قرار دیا اور اس سفر میں ان کا ساتھ دینے اور ہر قدم پر ان کی حوصلہ افزائی کرنے پر اپنے پرستاروں کا دل کی گہرایوں سے شکریہ ادا کیا کہ وہ حیدرآباد کی چھوٹی سی بچی کو آسمان کی بلندیوں تک لے گئے۔واضح رہے کہ ثانیہ مرزا نے اپنا آخری میچ ومبلڈن میں جولائی 2022 میں کھیلا تھا، اس وقت انہوں نے ٹوئٹر کے ذریعے ومبلڈن کو جذباتی الوداع کہہ دیا تھا۔ ابتدائی طور پر وہ گزشتہ سال یو ایس اوپن کھیلنے کے بعد پروفیشنل ٹینس سے ریٹائر ہونے والی تھیں تاہم انہیں انجیری کی وجہ سے انہیں اپنا ارادہ ملتوی کرنا پڑا۔
