نیو یارک (ڈیسک) وزیر خارجہ بلاول بھٹو زرداری نے عالمی رہنمائوں سے خطاب کے دوران مطالبہ کیا ہے کہ پاکستان پھر دہشت گردی کا شکار ہو رہا ہے اور ہمسایہ ملک دہشت گرد عناصر کی مدد میں ملوث ہے، بھارتی حکومت گاندھی کے نظریات پر عمل پیرا نہیں ہے بلکہ ہٹلر سے متاثر ہے۔ پاکستان میں دہشت گردی کے واقعات کے تانے بانے پڑوسی ملک بھارت سے ملتے ہیں جس کے ناقابل تردید ثبوت موجود ہیں۔ ٹیررازم کے ذمے دار عناسر کو کٹہرے میں لایا جائے۔
بلاول بھٹو زرداری نے امریکا میں نیوز کانفرنس کے دوران کہا کہ اسامہ بن لادن تو مر چکا ہے مگر گجرات کا قصائی زندہ ہے اور بھارت کا وزیر اعظم بنا ہوا ہے۔ انھوں نے واضح کیا کہ دہشت گردی کیخلاف جنگ میں پاکستان کی قربانیاں کسی سے کم نہیں، جس میں ہم نے قابل فخر کامیابیاں حاصل کیں۔ انہوں نے کہا کہ دہشت گردی کے خلاف جنگ میں اپنی کامیابیوں پر فخر ہے، دہشت گرد کا کسی خطے یا مذہب سے تعلق نہیں ہے اس لیے دہشت گردی کے ساتھ اسلام کو جوڑنا ہرگز درست عمل نہیں ہے۔
انہوں نے کہا کہ مسلم دنیا کو دہشت گردی کیلیے مورد الزام ٹھہرانا غلط ہے، تمام مسلمان دہشت گرد نہیں اور نہ تمام دہشت گرد مسلمان ہیں، 2001کے بعد سب سے زیادہ مسلمان دہشت گردی کا نشانہ بنے۔
وزیر خارجہ نے کہا کہ درحقیقت پاکستان میں دہشت گردی کیلیے بیرون ملک سے مدد کی گئی، دہشت گرد عناصر کو ہمسایہ ملک سے معاونت مل رہی ہے، جوہر ٹاؤن لاہور دھماکے میں بھارتی مداخلت کے ناقابل تردید ثبوت ہیں، بلوچستان کے عدم استحکام کیلیے بھی غیر ملکی عناصر سرگرم ہیں ۔
انہوں نے عالمی دنیا سے مطالبہ کیا کہ انسداد دہشت گردی کے قومی لائحہ عمل کے تحت ٹھوس اقدامات کیے، فیٹف نے دہشت گردوں کی مالی معاونت روکنے کیلیے ہمارے اقدامات کو تسلیم کیا، دہشت گرد گروپوں کا بیرونی مالی تعاون اور تربیت کی فراہمی کو روکنا ہوگا۔