کراچی (ڈیسک) سیکریٹری الیکشن کمیشن عمر حمید خان نے کہا ہے کہ سندھ میں بلدیاتی انتخابات وقت پر ہوں گے، الیکشن کمیشن اپنا آئینی حق استعمال کر رہا ہے، لوگ بلاخوف و خطر پولنگ کے لیے جائیں۔
کراچی میں پریس کانفرنس کرتے ہوئے عمر حمید خان نے کہا کہ صوبائی حکومت ہمیشہ بلدیاتی الیکشن میں رکاوٹ بنتی ہے، عوام کو اعتماد دینا ہے، لوگ بلاخوف و خطر پولنگ کے لیے جائیں۔انہوں نے مزید کہا کہ پولیس کی پوری معاونت حاصل ہے، سارے پولنگ اسٹیشنزپر سامان پہنچ جائے گا۔ ان کا کہنا تھا کہ جب صوبائی حکومت ہمیں کچھ لکھتی ہے تو ہم اس کا جائزہ لیتے ہیں۔ سندھ حکومت کی ہر درخواست کو دیکھا ہے۔ عمر حمید خان نے کہا کہ جو انہوں نے کرنا ہے کرلیں، ہم اپنا اختیار استعمال کریں گے، امن و امان کا قیام صوبائی حکومت کی ذمے داری ہے، ہم نے ہمیشہ مفاد عامہ کو مقدم رکھا ہے۔