کراچی (ڈیسک) پاکستان سے سودی نظام کے خاتمے سے متعلق کراچی میں سیمینار سے معروف صنعت کار عارف حبیب نے خطاب میں کہا کہ علمائے کرام سے درخواست ہے کہ اس اجتماعیت کو آگے بڑھاتے ہوئے سودی نظام سے چھٹکارا حاصل کیا جائے۔ عارف حبیب نے کہا کہ تمام پاکستانی سود سے چھٹکارا چاہتے ہیں، اسلامک بینکنگ کا نظام تیزی سے آگے بڑھ رہا ہے۔ انہوں نے کہا کہ اگر آج سے فیصلہ کروں کہ سودی نظام کا حصہ نہیں بنوں گا تو کیا پرانے گناہ معاف ہوجائیں گے۔ وفاقی ایوانِ صنعت و تجارت پاکستان کے قائم مقام صدر سلیمان چاؤلہ نے سیمینار سے خطاب میں کہا کہ بزنس کمیونٹی سود کو حرام سمجھتی ہے، بینکس میں اسلامی بینکاری سہولت کو مکمل طور پر لاگو کیا جائے۔سیمینار میں گورنر سندھ، گورنر خیبر پختونخوا بھی شریک ہیں۔ سیمینار وفاق ایوان ہائے تجارت و صنعت اور مرکز الاقتصاد الاسلامی کے اشتراک سے ہو رہا ہے۔