کراچی (ڈیسک) متحدہ قومی موومنٹ پاکستان نے کراچی اور حیدرآباد کے حالیہ بلدیاتی انتخابات کالعدم قرار دے کر ازسر نو الیکشن کرانے کا مطالبہ کردیا۔
کراچی میں پریس کانفرنس کرتے ہوئے وسیم اختر کا کہنا تھاکہ بلدیاتی انتخابات ہوئے پانچ دن ہوگئے لیکن نتیجہ اب تک نہیں آيا، موسم خراب ہے نہ برفباری، نہ ٹرن آؤٹ زیادہ ہے تو پھر انتخابی نتائج میں تاخیر کیوں؟ فافن اور الیکشن کمیشن سمیت سب کہہ رہے ہیں کہ انتحابات میں دھاندلی ہوئی۔ انہوں نے کہا کہ کراچی اور حیدر آباد کا بلدیاتی الیکشن کالعدم قرار دے کر نیا الیکشن کرایا جائے، وہ شہر جو اسلام آباد اورسندھ حکومت کابجٹ بناتاہے اس کاخیال کیا جائے، اگر بلدیاتی انتخابات میں ایسی دھاندلی ہوگی تو عام انتخابات میں کیا ہوگا؟ ان کا کہنا تھاکہ کراچی میں تین بار بلدیاتی انتخابات ملتوی ہوئے پھر بھی حلقہ بندیاں ٹھیک نہ کی گئيں، الیکشن سےپہلے ہی نہیں بعد میں بھی دھاندلی کی جارہی ہے، ووٹنگ ٹرن آؤٹ بڑھانے کے لیے مختلف طریقے اپنائے جارہے ہیں۔ ایم کیو ایم رہنما کا کہنا تھاکہ ایم کیوایم نے بائیکاٹ کیا تو ٹرن آؤٹ کم رہا، 2015 کے بلدیاتی انتخابات سے موازنہ کریں تو حالیہ الیکشن میں بہت کم ووٹ کاسٹ ہوئے، ووٹنگ کی شرح بڑھانے کے لیے دھاندلی کی جارہی ہے، ایم کیو ایم رہنما کا کہنا تھاکہ جماعت اسلامی، پی ٹی آئی، پیپلزپارٹی کوسمجھ نہیں آرہاکہ کیا کریں۔